Konna mmorru nġibu lit-tfal ikel, ħwejjeġ, nippruvaw ninteraġixxu, nilagħbu magħhom, ninkuraġġuhom, l-affarijiet li stajna nifilħu dak iż-żmien. Aktar tard, bdejna nġibu ħafna ħbieb u konoxxenti f’dawn iċ-ċentri, ippruvajna ninvolvu ruħna u ngħinu. Sfortunatament, l-affarijiet mhux dejjem kienu kif stennejna u rrealizzajna li kien hemm ċertu stat mentali fost in-nies li kienu jaħdmu f’dawn id-djar tat-tfal u li ma stajniex, fl-ebda każ, nibdlu ħafna.

Irrealizzajt li kien hemm ħafna tfal tat-triq fit-triq, tfal li kellhom jittalbu, tfal li ma kinux jafu jilagħbu, li kienu qed jiġġieldu. Ridt verament ninvolvi ruħi fil-ħajja ta’ dawn it-tfal u hekk beda “Il-Miraklu Bejn il-Blokki”. Bdejna niġbru lil dawn it-tfal, nixtrulhom ġugarelli u nilagħbu. Qattajt sajf sħiħ nilgħab mat-tfal fost il-blokki. Għallimthom kif jilagħbu, kif iġibu ruħhom, bdejna nsiru nafu lil xulxin, ninteraġixxu, nitkellmu dwar ċerti affarijiet fil-ħajja. Sajf li matulu t-tfal bdew jiffurmaw ħsibijiet dwar il-futur, ħafna mit-tfal kienu telqu mill-iskola. Meta resaq Settembru, ipproponejtilhom li mmorru l-iskola, nitkellmu mal-għalliema, nirreġistrawhom, nixtrulhom il-provvisti u nibdew sena skolastika.